賭波夠養妻活兒

賭波夠養妻活兒 　　賭馬維生的人，阿圖認識唔少。但阿圖最近同一個中學同學聚舊，傾談之下，同學告知，佢靠賭波維生，已經有8、9年。不過佢並非賭馬，而係賭波。佢賭波的主力，並非一般球迷鍾意玩的「主客和」，或者「讓球亞洲盤」，而係專攻「孖寶半全膽」。 　　「孖寶半全膽」跟「主客和」，以及「讓球亞洲盤」最大的分別，係後兩者乃盤口制，馬會開賭，跟投注人士對賭，而「孖寶半全膽」就同賽馬一樣，採用彩池制。即總投注額除馬會所抽的水，均分畀中彩人士。孖寶半全膽，每注投注可低至10元，若每注金額超過100元，可以買5元一注。 　　例子如下︰假設指定埸次為A和B，你買的波膽為A「上0:0」「全1:0」 B「上0:0」 「全2:0」這樣的話，10元就有交易。若果你買的波膽為A「上0:0 1:0」「全 1:0 1:1 2:1」 B 「上0:0 1:0」「全1:0 1:1」的話，每注10元，你要俾2X3X2X2注X10元=240元。 　　由於金額超過100元，你可以買5元一注，即係240元X0.5=120元，或者6元一注，即係240元X0.6=144元，如此類推，但係唔可以買4元或以下1注。若果中咗，假設派彩為每10元注派2000元，你買5元一注就派1000元，6元一注就派1200元。若果你每注金額唔超過100元，就唔可以買5元。 　　例如你買A「上0:0 1:0」「全1:0 1:1」B「上0:0 1:0」「全1:0」的話，你要俾2X2X2注X10元=80元。10元同100元的分別，就是在投注總金額上。同學點樣買法，以及中過幾多次大獎，他沒有詳細講，但佢沒有工作8、9年，靠賭波可以養妻活兒，成日去酒店扒房鋸下扒、飲下紅酒，命中率應該唔低。 　　歐冠盃準決賽，拜仁主場贏巴塞4比0，作客又贏3比0，同學話呢兩次「孖寶半全膽」，佢都係全港獨中，雖然每次只中5元，但因佢所花本錢好細，所以收穫相當豐富。佢仲話，差一點中埋多蒙特主場贏皇馬4比1個次，佢話多蒙特贏3比0及3比1佢都有買，偏偏沒有4比1呢瓣，失諸交臂，大為可惜。 　　一般球迷冇可能諗到，巴塞和皇馬呢兩支西班牙班霸，會雙雙被德國球隊大炒，但呢位同學能力買中，阿圖就唔係覺得好奇，事關在中學時代，佢已經係德國隊擁躉。當時大部分香港球迷捧英格蘭，佢偏偏最唔鍾意。阿圖就係阿根廷擁躉，阿根廷連續兩屆世界盃，都係畀德國隊淘汰，冇符。 　　孖寶半全膽，共有13期，球迷除預測兩場球賽中，全場90分鐘的正確比數外，更可預測半場45分鐘比數，增添樂趣。孖寶半全膽以彩池方式派彩，隨時有機會出現巨額彩池，加上派彩不設上限，回報可能令大家喜出望外。