世界盃32強誕生

世界盃32強誕生 賭運亨通 阿圖 26/11/2013 世界盃32強全部誕生，波斯尼亞成為2014年世界盃，唯一的新丁，烏拉圭、葡萄牙、比利時、伊朗捲土重來，東道主巴西、有球王美斯列陣的阿根廷、衛冕冠軍西班牙，以及人才輩出的德國，將會成為明夏世界盃的熱門，上個星期數場世盃附加賽，最刺激是葡萄牙對瑞典，最估唔到是法國反勝烏克蘭。 這場波開賽前，法國有很多動作，先有當地電視台天氣女郎，講明法國出線的話，會除衫報天氣，亦有色情網站話明，法國若反勝就免費開放網站任睇，一班經常鬧桃色糾紛的法國國腳，就係咁打得特別醒神。有樣就肯定係真，就係這場波，法國已穿上全新波衫應戰，擺明話俾大家知，下年巴西實見到佢地。 睇真些，原來附加賽兩支較出名球隊葡萄牙同法國，都係「一剔」成員，好彩他們出到線咋，唔係入到決賽周俾「三間」玩晒，就大件事啦。足球博彩不容易，最近的大冷門，是烏拉圭被逼和，烏拉圭在附加賽次回合，爆冷遭作客的約旦，悶和0比0，累到捧場客雞毛鴨血。 不過這支南美勁旅，仍然憑首回合，領先5比0的優勢晉級，名符其實搭上最後一班車，出席2014年在巴西舉行的，世界盃決賽周。大家不要以為0比0的賽果，是代表著烏拉圭留力，實情是他們的教練塔巴利斯，精銳盡出，慌死會留番一線生機，俾落後5球的約旦。 所以一對星級箭頭，卡雲尼同埋蘇亞雷斯，都有落場，當中卡雲尼上半場一次施射中網側，另外妙傳隊友高甸頭槌頂中橫楣，所以烏拉圭，是悉力以赴的。約旦首回合大比數落敗，加上實力始終唔及主隊，今仗攻門欠奉，是理所當然，佢地亦憑住全場壓迫性踢法，多次破壞烏拉圭攻勢，最終0比0賽和，算是有交代。 當然，總比數輸0:比5都係要出局啦，所以約旦成班球員，賽後只能夠睇住烏拉圭，在主場的上空放煙花，世界盃之夢到此為止。隨住烏拉圭躋身埋決賽周，32強亦全部誕生，驚喜就各佔一半，最驚就梗係伊巴謙莫域，無緣決賽周獻技，因為他代表的瑞典，在附加賽不敵葡萄牙。 留得住C朗呢位球王，又留唔住伊巴謙莫域，這一位好波之人，另外好似加里夫巴利，代表的威爾斯實在太弱，所以佢明年夏天，亦只能做觀眾。喜的是波斯尼亞，成為明年世盃唯一新丁，而比利時同埋伊朗等球隊，亦闊別多年捲土重來，其實他們在1986年墨西哥世界盃，都有閃亮演出。 但後來沒落，以致多次同決賽周擦身而過，當中比利時更加得過殿軍，今屆夏薩特、盧卡古同埋華美倫等球星坐鎮之下，有權重演27年前的神話，證明歐洲紅魔鬼唔係浪得虛名。不過大家要留意部份球星，好大機會係最後一次在決賽周出現，大家記住要望多兩眼。