慷慨善長顯馬圈溫情

慷慨善長顯馬圈溫情 過去鄰居高秋講過，「花月佳期」及「花月春風」馬主包大偉好好人，出心出錢開辦慈善機構The Hub Hong Kong，今年中最多貧困家庭人口深水，設立區內兒童服務中心，冇時間照顧小朋友父母，可以安心暫時交託，提供課餘補習教育玩樂，以至場內飲食一切零收費，咁錢從何來？唔係政府、馬會資助，而係佢做主力，輔以其他善長人翁慷慨解囊，上周五喺灣仔Grand Hyatt搞個大型慈善Ball，The Hub Hong Kong核心人物到齊，馬主如「闖」系張顯信、「綵」系Eddie王明澤、「先生」系阿史、「金獅」系David Garcia、「如你所願」Bankee關等等，前線如韋達、杜利萊等，及馬會EDR利達賢、Racing元老龍哥都有，全場五十席幾百人，Helen唔知實際籌募到幾多錢，只知肯定七位數，幾多百萬就唔清楚，但就代受惠家庭多謝各位。 呢晚除吃喝玩樂，最好玩係有馬票抽獎，又有大量精品供暗盤競投，如國際級著名畫家盧啟源、插畫大師Andy Warhol及海外猛人作品，與及多國不同酒店與星級餐廳美食，有底價但大家又唔知對方出乜價，基於從善原因，出手都零舍豪爽，馬圈無情，邊個話㗎！