贏梗貼士我打本

近日不斷有人對我講， 我快將有工作壓力，寫稿唔好寫到咁盡。我早知如此，國學大師季羨林的「真話能走多遠」和「牛棚雜憶」，我都約略讀過下。 我寫稿是想將以往做練馬師的心得和大眾馬迷分享一下，亦會將知道的事實報道出來，絕對不是靠估，亦非所謂爆料，我所知道的，和其他騎練知道的都一樣，只不過我已無合約在身（練馬師按年續約的， 並要通過體檢），在無約束（合約束縛）情況下報道出來，現職騎練講下都死，例如胡森之罰十萬大元便是一例，除非現任騎練唔想續牌啦，否則都要做住鵪鶉先囉，任何人士如果壞事無做，又怕乜被人（講）如實報道，我梁定華個File檔案幾尺厚，返大陸打高爾夫球都要批文，梁太寸步不離，實行做跟得夫人，能夠話自己係君子好人乎？我早已舉手投降。我唔想導人賭博，賭馬唔係做善事，賭仔性格其實都係貪婪，想心存僥倖。 一向都叫人唔好過份相信和依賴貼士，因為賽馬的意外太多，賽事過程起碼要接近一分鐘。如果的貼士真係得嘅，講俾你聽嗰個早巳發達喇，佢亦都唔會講俾第三者（你）知道，以免分薄嗰啲派彩。 呢個世界沒有賭博必勝的專家，如果有的話，那麼便不會有運氣這兩個字眼，不勞而獲是天理不容。賭錢專收叻仔，賭博集團（包括賽馬）所有賭博專家，拆穿咗，都係老千居多，我再大聲講一次，如有賽馬賭博專家，敢言必勝者，請預埋我，本錢我俾！ 許多資深馬迷都聽聞過早年有一位馬神的外籍賽馬賭博專家，跳樓自殺身亡，原因不明，但證明咗一件事，是佢生活得唔開心，錢不是萬能的，再思其次，或者真係為咗錢都唔定；尚有一位賽馬賭博專家， 他目前名片上的職業是馬販， 但廿年前在我認識佢的時候他已經是一位排名中游的職業投注人（Professional Punter）他提供貼士收取利益但也算是合法的，報紙和馬簿一樣提供貼士，賣7元至25元，就算用大字標題三甲必入，不勝無歸等字眼，事後位置不入都係咁啦。當其時他在跑馬地有一間小小辦公室，和一位過去係人都識澳洲騎師共用，一齊做職業投注人。 當時他已經開始販賣馬匹，俾過幾匹我睇，但太昂貴了，我無幫襯過，其後他行咗運，賣咗匹馬王到香港，講真，早知佢係馬王多多錢都唔賣啦，留番俾自己拎去跑，賺獎金都賺多幾十倍啦。