戒賭歌

妻離子散足球跑馬樣樣好

各位大家好 小弟我姓曹 全名曹運到 外號轉數高
荃灣有間鋪 生意算幾好 小康四人家 長居於大埔
營生上軌道 損友漸薰陶 初時賭賽馬 贏輸有個譜

有次買呂布 影相勝厘毫 連贏三重彩 孖T中番鋪
以為財運到 注碼漸漸豪 澳門頻博殺 生意無心撈
足球靠用腦 全靠技術高 睇準才落注 至愛阿仙奴

番攤盲二路 丫角咪糊塗 番膽隨我要 打和買過鋪
賭船招待好 三日來兩度 輸贏有得食 等住做富豪
百家樂等到 長閒有條路 博牌兩三邊 吹頂大聲嘈

大細憑運數 圍骰似張刀 全場唯我中 賠率極之高
贏錢鮑翅肚 白酒配生蠔 黃油要兩食 蒸魚叫三刀
年來春又到 職業變賭徒 好運隨夢去 狂輸要著草

貴利窮追數 日日上門嘈 通街塗大字 唔還命都無
老婆心火冒 鬧我正衰佬 堅決要離婚 報章出通告
走投已無路 日暮夾窮途 唯有博多博 偷運私煙草

好運難再度 失手變囚徒 刑事留案底 保安無得撈
如今方知道 當初笨似驢 烏絲成白髮 何堪歲數高
若然君有腦 應知點樣做 賭錢難富貴 只會誤前途

誠心來禱告 千祈咪再賭 決心離賭博 人生勝卷操
家空物淨偷呃拐騙入籠牢