做足功課捉冷馬

做足功課捉冷馬 　　要捕捉冷馬，賽前是必須做足功課，看錄影帶及賽績10多遍是等閒事，還要參考別人的意見，不能剛愎自用，如此才能有成。成功永遠是給有準備的人，這世界是沒有不勞而獲的事，生活如是，捉冷馬也如是。騎師在賽事前更是晨操及看影帶，做足備戰功課。 　　做功課分為賽前、賽事進行中及賽後3個環節，是缺一不可。當然最難的，是萬一輸了錢，在賽後還要做檢討，是很難有心機做得好。每個賽日都有一個形勢，冷開便冷，熱開便熱，臨場便要執生。像上周日賽事，韋達同潘頓兩位高手齊齊缺陣，果然全日大放冷氣，百分百無路捉。 　　之前周二元旦賽，卻普遍利熱門，只有兩匹頭馬有10倍以上。挾世界馬王「范高爾」鞍上人之大名，而初次來香港客串之英國好手祁義理，經過差唔多一個月適應，雖然支持都唔算多，但係元旦日2013年首次賽事，終於策騎伍碧權訓練的「鼓浪春風」開齋，總算係新一年有個好開始。 　　早兩鋪先至開齋的「鼓浪春風」，由於夾慣夾熟的梁家俊停賽，今次就換人畀祁義理執韁，即使抽13檔，沿途被迫走外疊，但拉士在佢極力催策下，仍壓倒熱門「愛蓮說」，幫佢贏得重要的頭馬。祁義理賽後話，好開心係新一年可以贏馬開齋，佢話一早已着手研究呢場賽事，本身都有很大信心。 　　「鼓浪春風」台前幕後笑開懷。至於「鼓浪春風」由於抽外檔，全程都走外疊蝕位，好彩隻馬拉士都有唔錯反應，終於幫佢自己贏番場，祁義理希望呢場頭馬，係一個好開始，稍後可以陸續有來。上次伍廄差一點中三元個日，即尾場被告甩嗰日，隻「豐彩人生」都是交畀祁騎，結果輸了。 　　阿圖都有買，仲作連贏馬膽，事後馬匹都要拉埋倉，馬主都好唔畀面，因之前都有頭馬，以及伍廄最後一季，可見馬主都好不滿。 　　另一方面，德國練馬師薛達志，自從上年11月28號贏出隻「好球」之後，一直都再無進帳，雖則試過有「競技英雄」先過終點，但係因為阻到「太奇妙」被貶落第二，連薛達志都大感冇癮。 　　卒知等到2013年元旦戰，佢終於否極泰來，在第八場靠郭能騎隻「強中堅」建功。此駒後上殺低落飛到大熱門的「博愛福星」，兼幫佢打破逾一個月悶局。賽後薛達志表示，今次趕返香港督師即刻有馬贏，梗係好開心，佢覺得「強中堅」本身都有好質素，事關初出已經可以在谷草一哩入Q。 　　之但係呢隻馬跑法比較被動，又容易緊張，似乎谷草唔係好合發揮，所以決定轉往沙田再搏。終於證明部署奏效。薛達志話今仗郭能固然騎得好，但係「強中堅」亦都跑到水準，佢話只要隻馬情緒可以再放鬆一點，長遠來講，肯定係一隻唔錯的馬。以上兩個例子都充分說明，捉冷馬真係要做足功課。